吳小姐 (Miss Ng) (Live at KITEC Star Hall 2019)

Lyrics

[​my little airport「吳小姐 (Live at KITEC Star Hall 2019)」歌詞] [主歌一] 吳小姐畢業之後 做咗銀行十幾年 最近佢單身 罷工嗰日自己一個去彌敦道 黃昏嘅時候 成條馬路都係黑衫嘅年輕人行嚟行去 尖沙咀同其他區已經放咗催淚彈 佢一路行 一路睇下 live 聽下條街啲人講點部署 冇幾耐天開始黑 行到豉油街 經過兩間日本嘢 佢都好想入去食住涼冷氣 不過噉好似幫襯咗冇罷市嘅食店 最後佢猶豫咗一陣 都係喺小販檔買咗兩個桔返示威區 坐喺十字街口嘅馬路邊 一路食一路有啲涼風 [副歌] 就在她坐下的那個瞬間 她竟有前所未有的嘆 [主歌二] 食食下有人問佢要唔要水 有人問佢去唔去深水埗警署聲援 有個女仔指住太子方向 話一直行就會到 吳小姐走咗幾步覺得太遠 都係搭地鐵 去到現場 有人叫佢唔好行咁前 然後 佢第一次 親眼見到催淚彈 佢跟住大家 向後褪 開遮 踎低 行返前 來來回回 幾粒催淚彈之後 佢有種從未試過嘅感覺 時間突然好慢 周圍好靜 佢覺得呢個瞬間 最前線嘅人係自己 後面用士巴拿拆緊鐵欄嘅人又係自己 旁邊鬧緊街坊唔好影相嘅人又係自己 遠處坐緊監嘅人又係自己 冇幾耐大家話轉場去另一個警署 吳小姐坐喺紅綠燈下面食咗支煙 [副歌] 就在她坐下的那個瞬間 她竟有說不出的感嘆 [結局] 最後防暴衝出嚟 吳小姐狂跑嘅時候 竟然跑得快過晒所有嘅人 佢決定 以後都出嚟